[albanur]

Arben Shaqiri

Arben Shaqiri vjen në skenën muzikore shqiptare me këngën “Më shkruaj”


Shkup: Arben Shaqiri e ka gati videoklipin e tij të parë në gjuhën shqipe “Më shkruaj”, i cili pritet të dalë në treg pas pushimeve, në muajin shtator.

AlbaNur: Pse zgjodhët muajin shtator për ta publikuar videoklipin e ri?

Arben Shaqiri: Kënga së bashku me klipin quhet “Më shkruaj”, do të dalë në shtator, sepse popullit tash i nevojitet deti dhe një pushim i mirë dhe i qetë, kështu që s’besoj se ka kush nevojë për klipet tona para shtatorit.
Këngën e kemi punuar tetë muaj që do me thënë i kemi kushtuar pak më tepër kujdes instrumenteve dhe vet produksionit, sepse, fundja, është fjala për rokenrol, i cili nuk punohet shpejt.

AlbaNur: Çka e bën të veçantë videoklipin?

Arben Shaqiri:Videoklipi, i incizuar në qendër të Shkupit, në muajin mars, besoj se do t’u pëlqejë atyre që kanë shije për videoklipe. Aty ka muzikë dhe jo vajza pothuajse të zhveshura. Kështu, urdhëroni, kush do le ta ndjekë me vëmendje.

AlbaNur: Pse pikërisht tani, me këngë shqipe?

Arben Shaqiri: Unë këngët e mia nuk i ndaj në shqipe apo kineze. Muzika është një “problem” global, që nuk duron ndarje në bazë etnike. Muzikën ose e ke të mirë ose më mirë është të merresh me ndonjë aktivitet tjetër. Sa e shoh unë, në Ballkan, kush ka incizuar ndonjë këngë menjëherë dhe pa kurrfarë kriteri është paraqitur në TV. Kam vlerësuar se tani është çasti i vërtetë të dalë ky material në gjuhën shqipe, sepse vlerësoj se në estradë ka një zbrazëtirë të vogël në mozaikun muzikor shqiptar dhe pikërisht aty unë kisha mundur të hy me një drejtim muzikor të tipit “mainstream rock”, i cili do të ishte një freskim i skenës shqiptare. Mund të jesh yll vetëm me muzikë të sinqertë dhe, me sa shoh, muzika jonë është prodhim i komplekseve të disa njerëzve që kanë dëshirë të merren me muzikë vetëm sa për t’i njohur nëpër rrugë dhe kafene. Të rrallë janë ata të cilët merren sinqerisht me art dhe muzikë dhe kanë dëshirë dhe nevojë të lënë diçka pas vetes. Ky është mendimi im dhe s’do të thotë se kam të drejtë.

AlbaNur: Deri më tani shumë pak jeni paraqitur nëpër media dhe festivale shqiptare, pse?

Arben Shaqiri: Aspak nuk jam larguar nga mediat dhe festivalet shqiptare, por nuk kam dashur dhe nuk dua t’i jap dikujt intervistë, i cili më bojkoton vetëm sepse unë këndoj në gjuhë tjetër. Atyre nuk u pëlqej sepse nuk merrem me muzikë komerciale ose ata kanë problem me komplekset e tyre! Kam të drejtë t’i drejtohem popullit tim atëherë kur e ndjej çastin e vërtetë për ta publikuar një material në gjuhën time, e ajo është gjuha shqipe. Kështu që, unë ju drejtohem të gjithë atyre të cilët kanë nevojë për art, kulturë e muzikë. Mua aspak nuk më intereson politika dhe s’kam as dëshirë, as kohë, as nerva që të merrem me thashetheme. Në festival mund të marrë pjesë, por jashtë kufijve të Maqedonisë, pra në Shqipëri ose në Kosovë. Këto festivalet tona, tash për tash, nuk më interesojnë, që s’do të thotë se nëse ndërrohet klima e festivaleve ndoshta do të kisha marrë pjesë, por tani kam prioritete tjera në sferën e muzikës shqipe.

AlbaNur: Një pyetje e pashmangshme: planet për të ardhmen?

Arben Shaqiri: Ah! Kam plan që të bëj një dush, të dal në qytet për një kafe, pastaj të shkoj deri në studio ku e përgatis materialin që do të dalë aty kah viti ri. (qeshet)

.