[albanur]

Skenari i videoklipeve shqiptare me regji katastrofale

Problemi qëndron tek producentët që bëjnë manipulime me të holla. Te ne funksionon sistemi: “I huaji di më tepër”, që është një gabim i madh. Ka shumë ide, lokacione dhe realizime të ndryshme të cilat mund të përdoren, thotë regjisori Ahmet Jakupi

Në shumicën e videoklipeve shqiptare haset ngjashmëri e madhe kuadrosh dhe vendesh me videoklipet e këngëtarëve dhe këngëtareve maqedonase. I tillë është klipi “Sadist” nga Mimoza Mustafa, që është gati identik me videoklipin e një këngëtareje të re maqedonase. Klipi i saj është i punuar nga produksioni “Labia” dhe në bashkëpunim me “Video Lab” nga Maqedonia. Në këtë klip vërehet kafeneja e njëjtë, kuadro dhe detaje të njëjtë si në klipin e një këngëtare maqedonase.

Gjithashtu “Gajdexhiu” i Zanfina Ismailit, përputhet me një videoklip të këngëtares Maja Vukiçeviç. I tillë është edhe një videoklip i Sonit, Gresa dhe shumë e shumë klipe të tjera.

Kritikët thonë se këto klipe duken monotone pasi publiku në Maqedoni i ka parë më parë. Disa mendojnë se problemi qëndron te këngëtarët të cilët nuk kanë ide se çfarë kërkojnë, ndërkaq të tjerët ndajnë mendimin se producentët kanë interesin e të hollave dhe nuk e kanë vëmendjen në punën që e bëjnë.

Këto klipe, si zakonisht, punohen nga Dejan Miliçeviç, të cilin nuk kishim mundësi ta gjejmë, pasi që ndodhet jashtë shtetit, por nuk janë të rrallë edhe klipet e këtilla nga produksionet “Tomato”, “Fabrika” apo “Alexander”.

Ngjashmëria e klipeve mohohet nga regjisori Marijan Ognenovski nga produksioni “Fabrika”, sipas të cilit, “nuk na ka ndodhur të punojnë dy klipe të njëjta”, por edhe nga Dobre Tasev i produkcionit “Tomato”, sipas të cilit, “asnjëherë nuk kanë përsëritur një kuadër të njëjtë”.

Por konstatimet e tyre duket se bien ndesh me atë që ndodh realisht.

Klipi “Gajdexhiu” i Zanfina Ismailit është i punuar nga Alexandri. Ai për klipet e ngjashme arsyetohet se në Maqedoni nuk ka zgjedhje të mjaftueshme të lokacioneve dhe se gjithë kjo rezulton në lokacione dhe kuadro të njëjta.

“Mua nuk më ka ndodhur të bëj klip të njëjtë dy herë. Më ka ndodhur vetëm të shoh lokacion dhe kuadro të njëjtë si në klipet e mia, mirëpo të punuara nga ndonjë produksion tjetër”, thotë për “Lajm” Alexander.

Regjisori shqiptar Ahmet Jakupi, thotë se vetëm ai mund të numërojë mbi gjashtë video klipe që kanë një lokacion dhe një ide realizuese. “Unë mendoj se problemi qëndron tek producentët që bëjnë manipulime me të holla. Te ne funksionon sistemi: “I huaji di më tepër”, që është një gabim i madh. Ka shumë ide, lokacione dhe realizime të ndryshme të cilat mund të përdoren”, thotë Jakupi.

Këngëtari Agim Poshka mendon se këngëtarët janë ata të cilët duhet të kenë më tepër kujdes.“Këngëtarët, duke mos pasur ide paraprake, u mundësojnë producentëve të punojnë sipas dëshirës së tyre, duke përsëritur punën dhe kuadrot nga ndonjë klip tjetër, të punuar më parë”, thotë Poshka.