[albanur]

Forumi Agim Çekut ne AlbaNur


Biografia e kryetarit të PSD-së z.Agim Çeku

I lindur në Qyshk të Pejës, më 29 tetor 1960. Babai i tij Hasan Çeku ishte një nga mësuesit e parë të asaj ane dhe një njeri shumë shumë i dashur dhe i respektuar. Prej tij do të merrte mësimet e para edhe Agimi. Në prill të vitit 1999 Hasan Çeku u ekzekutua barbarisht nga forcat ushtarake dhe policore serbe në Masakrën e Qyshkut, si shenjë hakmarrje ndaj birit të tij , Agimit, i cili në atë kohë ishte në krye të UÇK-së. Në këtë masakër u vranë edhe shumë të afërm dhe bashkëvendas të Agimit Çekut.

Në prill të vitit 2008, Agim Çeku mori në drejtim Partinë Socialdemokratike të Kosovës, një parti me orientim evropian që synon ndërtimin e shoqërisë moderne dhe të sistemit demokratike në Kosovë sipas modelit të sprovuar të socialdemokracisë evropiane. z. Agim Çeku solli në parti njerëz të rinj, të shkolluar në Evropë, solli energji të reja me synim freskimin e partisë dhe bërjen e saj faktor relevantë në skenën politike të Kosovës.

Me 10 mars të vitit 2006 është emëruar Kryeministër i vendit nga Kuvendi i Kosovës. Këtë detyrë e ka kryer me përgjegjësi të plotë deri në përfundim të mandatit të Qeverisë se udhëhequr prej tij me 10 janar 2008.

Si kryeministër i zgjedhur në një moment historik për Kosovën z. Çeku ka luajtur rol të rëndësishëm në forcimin e stabilitetit të brendshëm politik dhe të sigurisë, ka dinamizuar punën në implementimin e standarteve duke e përshpejtuar procesin e definimit të statusit dhe duke e bërë Kosovën gati për pavarësi. Ky angazhim është vlerësuar me nota të larta edhe nga faktori ndërkombëtar.

Në cilësinë e kryeministrit të vendit dhe si pjesë e Grupit të Unitetit ka marrë pjesë aktive në të gjitha bisedimet e rëndësishme për Kosovën në procesin e udhëhequr nga bashkësia ndërkombëtare, e përfaqësuar nga presidenti Ahtisari.

Z. Çeku ka zhvilluar një aktivitet të dendur diplomatik në mbështje të çështjes së Kosovës dhe e ka përfaqësuar e denjësisht Kosovën në shumë konferenca dhe forume të rëndësishme ndërkombëtare. Poashtu ka botuar në vazhdimësi shkrime dhe editoriale në gazetat me prestigjioze të botës, në të cilat ka argumentuar bindshmën nevojën e definimit të statusit të Kosovës.

Para se të emërohej kryeministër i Kosovës z. Agim Çeku ka qenë për afro 7 vite komandant i Trupave të Mbrojtjes së Kosovës. Ai ka pasur një rol kyç në krijimin, dizajnimin, ndërtimin dhe zhvillimin e kësaj force bazuar në standartet dhe parimet perëndimore.

Në shkurt të vitit 1999, z.Çeku u largua nga Forcat e Armatosura Kroate, si shef i shtabit të korpusit të 5-të të kësaj ushtrie, me gradën gjeneralbrigade dhe iu bashkua Ushtrisë Çlirimtare të Kosovës (UÇK).
Ai mori detyrën e shefit të Shtabit të UÇK-së në periudhën më të vështirë të luftës, gjatë fushatës së bombardimeve të NATO-s, detyrë të cilën e kreu me plot sukses.

Z. Agim Çeku ka qenë në kontakt të vazhdushëm me drejtuesit e UÇK-së prej themelimit të saj dhe në vitin 1992 ka nënshkruar deklaratën me të cilën është vënë në dispozicion të organizimit ushtarak për çlirimin e Kosovës.

Pas luftës z. Agim Çeku udhëhoqi me sukses negociatat për transformimin dhe demilitarizimin e UÇK-së në Trupat e Mbrojtjes së Kosovës. Për këtë angazhim ai mori lëvdata të shumta nga bashkësia ndërkombëtare. Ai e shndërroi TMK-në në një institucion shumë profesional dhe e bëri atë institucionin me të besueshëm dhe me te respektueshëm në mesin e qytetarëve. Gjeneral Agim Çeku gjatë kohës sa udhëhoqi dhe drejtoi me plot sukses TMK-në ishte personaliteti me i popullarizuar dhe me i respektuar në Kosovë.

EDUKIMI DHE KARRIERA USHTARAKE
- 1975 Regjistron Shkollën e Mesme Ushtarake në Beograd
- 1979 Mbaron Shkollën e Mesme Ushtarake, në Beograd
- 1984 Mbaron me sukses Akademinë e Artilerisë , në Zarë
- 1984 – 1986 Komandant togu i Artilerisë në ish APJ
- 1986 – 1987 Komandant togu dhe ligjerues në Shkollën për Oficerë Rezervë në Qendrën e Artilerisë në Zarë
- 1989 – 1991 Komandant i kompanisë së kadetëve dhe ligjërues në Akademinë Ushtarake, në Zarë
- 1991 Largohet nga armata jugosllave, me gradën kapiten, dhe i bashkohem ushtrisë kroate. Gjatë këtyre 2 viteve ka kryer këto detyra
- Komandant i një baterie të minahedhesve në Brigadën 112 Zarë.
- Zv.komandant i një batalioni të këmbesorisë.
- 1992 Komandant i një batalioni të këmbësorisë. Merr gradën major.
- 1993 Shef i Artilerisë në Brigadën 112, ku drejtoi dhe komandoi artilerinë gjatë operacionit “ Maslenica “.

Në të njëjtin vit transferohet në Brigaden 9-të Gardiste Profesionale në Gospiq si shef i artilerisë. Merr gradën kolonel.

Në shtator të vitit 1993 gjatë operacionit sulmues “ Xhepi i Medakut “ plagoset në një aksion ushtarak.

- 1994 Caktohet në distriktin ushtarak të Gospiqit si udhëheqës i llojeve të ndryshme të armëve.
- 1995 Emërohet Shef i Shtabit të Distriktit Ushtarak të Gospiqit dhe në këtë detyrë i komandon forcat e këtij distrikti në Operacionet Sulmuese “ Stuhia ”, ‘ Vetëtima’, ‘Potezi i Jugut ‘ dhe operacione të përbashkëta të ushtrisë kroate dhe asaj boshnjake në çlirimin e Bosnës. Për kontributin në këto operacione gradohet me gradën gjeneral brigade i ushtrisës kroate.
Emërohet Shef i Shtabit të Korpusit të 5-të të Armatës Kroate.
- 1993 – 1998 Ndjek programin e trajnimit për transformimin e ushtrisë kroate nga koncepti i lindjes në konceptin perëndimor të udhëhequr nga kompania amerikane MPRI.
- Shkurt 1999 Lirohet nga ushtria kroate për t’iu bashkangjitur UÇK-së.
- Prill 1999 Si gjeneral brigade i ushtrisë kroate emërohet Shef i Shtabit të Përgjithshëm të UÇK-së.
- Qershor 1999 Udhëheq bisedimet për transformimin dhe demiltarizimin e UÇK-së. Gradohet me gradën gjenerallejtnat.
- Shtator 1999 Emërohet komandant i TMK-së.
- Shtator – Tetor 2001 Mbaroi „ Senior Exetutiv Kurse „ në Qendrën Marshall në Gjermani.

DEKORATAT DHE MIRËNJOHJET
- Për kontributin e dhënë për çlirimin e Kroacisë, shteti kroat i ka ndarë z. Çeku dekorata dhe mirënjohje, të cilat u jepen vetëm personaliteteve me merita të jashtëzakonshme:
Red Bana Jelacica ( Urdhërin e Bane Jelaçiqit )
Red Nikole Subica Zrinskog ( Urdhërin e Nikola Shubiq Zrinskit )
Medalja za Iznimni Podhvat ( Medaljen për trimëri dhe vepër të jashtëzakonshme luftarake ) ;
Red Hrvatskog Kriza ( Urdhërin e Kryqit Kroat ) ;
Red Hrvatskog Trolista ( Urdhërin e Trefletëshit kroat );
Red Hrvatskog Pletera ( Udhërin e Gjerdanit Kroat ) ;
Spomenicom Domovinske Zahvalnosti (Dekoratën Falenderimi nga Atdheu);
Medalja za Operaciju ‘ Oluja ‘ (Medaljën “ Stuhia “ ) ;
Spomenicom Domovinskog Rata (Dekoratën Përkujtimore për Luftën Atdhetare ).

Poashtu z. Çeku ka marrë mirënjohje, lëvdata dhe dhurata nga presidenti kroat, ministri i mbrojtjes dhe shefi i shtabit të përgjithshëm të ushtrisë kroate.

Për kontributin e dhënë në çlirimin e Kosovës z. Agim Çeku është dekoruar pas luftës me Urdhërin ‘ Adem Jashari ‘ .

Ish-komandanti Suprem i NATO-s për Evropë gjenerali Vesli Klark e ka dekoruar gjeneral Agim Çekun me ‘ Dekoratën për Shkëlqyeshmëri ‘ .

Në mars të vitit 2006, Presidenti i Kosovës, Fatmir Sejdiu, ka dekoruar zotëri Çekun me Medaljen e Lirisë për Merita Ushtarake.

Z. Çeku flet rrjedhshëm gjuhën angleze dhe gjuhën kroate. Është i martuar dhe ka tre fëmijë: dy djem dhe një vajzë.


------------------------------------------
Ne ju lusim prej perpara të mos përdorni fjalë banale, të mos inatoheni, të mos shaheni, por të tregohemi se jemi të denjë qe t'i kuptojmë drejtë proceset demokratike në ndertimin e institucioneve tona dhe shtetit ligjor për qytetarët shqiptarë në trojet etnike Shqiptare!

Ju mund të regjistroheni të postoni komentete e juaja duke klikuar KETU dhe ky regjistrim, pervec në Forum, do ju mundëson t'i shfrytezoni edhe sherbimet tjera që ofron AlbaNur për shqiptaret në Internet!

Nese keni problem me Regjistrimin, ju mund t'i shihni video incizimet tona duke klikuar KETU!