[albanur]

Agolli: Unë në debatin Qose-Kadare

Shkrimtari i njohur komenton debatin mes Ismail Kadaresë dhe Rexhep Qoses për identitetin e shqiptarëve

“Ne 400 vjet para Krishtit kishim Teutën dhe Agronin”

TIRANE - Shkrimtari dhe poeti Dritëro Agolli ka marrë pjesë në veprimtarinë letrare artistike “Një mbrëmje me Dritëro Agollin”, veprimtari e organizuar nga ana e Ministrisë së Turizmit, Kulturës, Rinisë dhe Sporteve, si dhe Biblioteka e Durrësit. Në një takim me lexuesit, shkrimtari Dritëro Agolli ka theksuar, ndërmjet të tjerave, se ai gjithmonë i ka parapëlqyer takimet me lexuesit, por mosha dhe shëndeti e ka bërë që të takohet rrallë me ta. Poezia, sipas Agollit, ka nevojë jo vetëm për malet, por edhe për detin, për zogjtë që fluturojnë mbi të dhe peshqit që fshihen në ujërat e kaltra. Në takimin romantik në “Torrën veneciane”, janë recituar nga aktorë të teatrit “Aleksandër Moisiu”, poezi të Dritëro Agollit. Më pas gjithçka ka marrë formën e dialogut të poetit me lexuesit.

Cili është opinioni juaj në lidhje me debatin Qose-Kadare?
Ato janë debate që iu duhen njerëzve, shkrimtarëve, por unë mendoj se duhet të qëndrojnë brenda debateve, nuk duhen thënë gjëra që tingëllojnë keq ose duhen tentuar të hidhen poshtë me argumente, pa bërë zhurmë të madhe. Unë mendoj se ata që hyjnë në këtë debat duhet t’i mendojnë mirë këto probleme dhe të jenë njerëz të mirinformuar, të jenë brenda identitetit dhe të mos e marrin këtë identitet kombëtar apo karakterin tonë kombëtar të lidhur vetëm me problemet e fesë. Feja në botë është relativisht e re. Ka vetëm 2000 vjet që ka dalë Krishti, kurse ne 400 vjet para Krishtit kishim Teutën dhe Agronin, princat tanë me të cilët ne mburremi. Duke thënë vetëm “të krishterë apo myslimanë”, ne e varfërojmë identitetin tonë. Nuk mund të thuhet se është vetëm krishtërimi me të cilin shkohet në Evropë; janë shumë gjëra me të cilat shkohet në Evropë. Në Evropë hyjnë me anën ekonomike, atë të zakoneve; p.sh. Ne kemi akoma hakmarrjen. A hyhet në Evropë me hakmarrjen? Ka edhe probleme të tjera si identiteti gjuhësor, por edhe aspekti gjeografik. Nuk hyhet në Evropë nëpërmjet ndarjes së principatave në Veri, Jug, Shqipëri e Mesme etj. Është thënë që në Rilindje se feja e shqiptarit, është shqiptarizmi. Këto gjëra duhet të dihen nga njerëz që janë të informuar mirë, pasi mund të jesh shkrimtar dhe nuk je i informuar mirë. Unë mendoj se Rexhep Qosja është një njeri i informuar mirë. Ai i di më mirë se të gjithë ne këto probleme. Shkrimtarët dinë të bëjnë romane, poezi, libra, por ka gjëra që të tjerët i dinë më mirë se shkrimtarët.

Si e shikoni idenë e federatës së majtë të hedhur kohët e fundit në tregun politik?
Ideja e federatës është një ide e mirë. Është një titull që i vihet, por edhe bashkimi është federatë. Unë mendoj që këto probleme duhen diskutuar bashkarisht. Duhen diskutuar në kryesi, komitet drejtues dhe të mos merren vendime vetëm nga një njeri. Partia është një repart tjetër lloj, ku vendoset bashkarisht dhe jo një zyrë ku vendos unë dhe s’ka njeri tjetër. Nuk do të shkosh të lidhësh kabllo elektrike. Partia është një organizëm i gjallë, ku po prishe ndonjë ind apo celulë, prish të gjithë organizmin. Kjo është një ide e mirë, por vendimet nuk duhet të merren nga kryetarë partish.

Në kushtet kur prej 15 vjetësh skena politike shqiptare po dominohet nga individët, a ju duket se kjo lideri i selisë rozë, Edi Rama, e ka autoritetin e duhur për të realizuar në praktikë këtë ide?
Individi loz rol të madh në shoqëri, por nuk është ai që është determinant. Janë forcat e përbashkëta, partitë janë me organe kolektive. Kështu janë të gjitha partitë dhe jo vetëm Partia Socialiste. Dikush ka asamble drejtuese, dikush këshillin kombëtar, dikush komitet drejtues. Nuk është vetëm problemi i Partisë Socialiste, por problemi i të gjitha partive. Por te ne funksionon ndryshe. Po e tha Njëshi, mbaroi ajo punë. Po e tha Berisha, p.sh. kush do ta kundërshtojë?