[albanur]

Agnesa Vuthaj

MKRSJÇ ende nuk ka ndarë mjete financiare për “Miss Kosova 2006”
Fituesja e kurorës së bukurisë “Miss Kosova 2003” Agnesa Vuthaj tha të enjten në një intervistë për Kosovapress se spektakli i sivjetmë “Miss Kosova 2006”, i cili do të mbahet të shtunën në Prishtinë, është financuar me mjete vetanake dhe me ndihmën e disa sponsorëve. Ajo thotë se përveç përkrahjes morale nga Ministria e Kulturës, mbështetje financiare nga ana e kësaj ministrie nuk ka pasur deri tash, pavarësisht premtimeve të mëhershme. Fituesja e kurorës, sipas Vuthajt, do të marrë një bursë studimesh, kontratë njëvjeçare të punës në Dubai dhe do të përfaqësojë Kosovën në “Top Model of dhe World”.

Kosovapress: Si ka shkuar puna rreth organizmit të “Miss Kosova 2006” i cili pritet të mbahet kësaj jave?
Agnesa Vuthaj: Organizimi ka filluar qysh më parë, mirëpo konkursi ka qenë i hapur për një muaj, ku është bërë edhe përzgjedhja e vajzave për pjesëmarrje në natën finale. Me përzgjedhjen e vajzave kanë filluar edhe aktivitetet me prova, xhirime, fotografime si dhe disa aktivitete humanitare siç është fjala për një trajnim të zhvilluar me Kryqin e Kuq.

Kosovapress: Cilat janë kriteret që një vajzë duhet t’i plotësojë për të marrë pjesë në “Miss Kosova 2006” dhe a ka pasur konkurrencë të vajzave për këtë spektakël?
Agnesa Vuthaj: Mund të flasim për një konkurrencë mjaft të madhe, ndërsa kriteret që është dashur t’i plotësojë një vajzë është mosha, e cila duhet të jetë prej 17-24 vjeç, të ketë gjatësi mbi 170 cm, të ketë mençuri dhe bukuri.

Kosovapress: Nga janë marrë mjetet financiare për këtë spektakël bukurie?
Agnesa Vuthaj: Ky spektakël kryesisht është organizuar nga ana ime dhe me ndihmën e disa sponsorëve.

Kosovapress: A keni pasur mbështetje financiare nga Ministria e Kulturës deri më tash ?
Agnesa Vuthaj: Përveç përkrahjes morale, ne ende nuk kemi pasur ndonjë mbështetje financiare nga ana e kësaj ministrie dhe ne presim këtë mbështetje mbase vetë na është premtuar.

Kosovapress: A ju është caktuar vlera e kësaj përkrahje?
Agnesa Vuthaj: Shuma nuk është cekur se sa do të jetë, pasi që ata shkojnë në bazë të përqindjes. Ajo që është premtuar është 5 eventualisht 10 për qind e projektit.

Kosovapress: Ju thatë që shumica e këtij spektakli është financuar me mjete vetanake. A mund të dimë diçka më shumë?
Agnesa Vuthaj: Nuk mund të them asgjë për momentin pasi që mund të jap vetëm shifra të gabueshme, mirëpo me përfundimin e këtij spektakli do të bëhet e ditur e gjitha, pasi ka ende punë për t’u bërë.

Kosovapress: Cilët janë mysafirët e këtij spektakli dhe kush e ka konfirmuar pjesëmarrjen?
Agnesa Vuthaj: Pjesëmarrjen e ka konfirmuar Xhon Methju, njëri nga organizatorët e spektakleve të bukurisë në Indi, i cili ka edhe një agjenci modelesh në Dubai, pastaj një përfaqësues nga “Miss Universy”, Fadil Berisha, si dhe “Miss” India, Norvegjia dhe Shqipëria.

Kosovapress: Kush do të jetë udhëheqës i këtij spektakli ?
Agnesa Vuthaj:Udhëheqës do të jenë Fehmi Ferati dhe Laura Krasniqi.

Kosovapress: Çfarë do të jetë shpërblimi për fituesen e kurorës së bukurisë?
Agnesa Vuthaj: Për fituesen e kurorës do të jetë një bursë studimesh, kontratë punë njëvjeçare në Dubai, si dhe do të jetë përfaqësuese e Kosovës në “Top Model of dhe World.”

(Mirjeta Dervishi)