[albanur]

BUKURIA NUK KA VLERË PA VIRTYTET SHPIRTËRORE!

Në shikim të parë fotografia flet vetë kushdo që viziton faqen zyrtare albanur.net. Një fytyrë shumë e dashur dhe e këndshmë duket sikur na kujton zanat e bukura të legjendave të moçme shqiptare. Një shikim i thellë na bën për vete dhe na dhuron ngrohtësi. Nga sytë e zjarrtë na duket një femër që në shpirtin e saj ka një botë të brendshme interesante. Nje bote qe eshte rezultat edhe i prinderve qe, edhe pse larg vendlindjes, e edukuan vajzen sipas frymes shqiptare. Është mrekulli e madhe kur shohim femrat tona shqiptare, të cilat pushtojnë me sharmin e tyre skenat evropiane duke sviluar si mjellma të bukura në skenografitë ku vetëm yjet mund të kapen nga qielli…
Kush mund të jetë kjo në fotografi, pos " Miss Sharmi ", çmim që flet shumë për ardhmërinë e Teuta Shabanit nga Tërnoci me banim në Suedi.

Keni marrë pjesë në disa spektakle të bukurisë. Si e vlerësoni vlerën e bukurisë?

Teuta Shabani: Bukuria është një ndjenjë, që vlerësohet shumë në botën e sotme, por mendoj bukuria dhe lumturia shpirtërore janë dy virtytet e karakterit që përbëjnë thelbin e kulturës për fotomodelen, edhe pse, në realitet bukuria është vetëm një dhuratë nga perëndia. Pa funksionimin e shumë njohurive përkatëse nuk mund të qëndrojë kohë të gjatë as bukuria fizike tek një femër sado yll apo siç thuhet superstar të jetë ajo.

Cili është roli i Juaj si fotomodele në agjensinë në " Toronto"?

Teuta Shabani: " Divine " është një agjensi sikur shumica e agjensive në kontinentin e USA. Kjo agjensi u ofron modeleve të veta role: të aktrojnë, të sfilojnë në Catwalk, të bëjnë reklamime për rroba të firmave të ndryshme, reklamim të rrobave në kataloge të firmave dhe pjesëmarrje në videospote.
Unë, personalisht nuk kam pas mundësi të marrë pjesë si modele në ofertat e tyre ende, sepse e kam zgjedhur të kthehem në Evropë për të përfunduar ëndrrën time, për të realizuar një album muzikor në gjuhën shqipe.

Si e keni ndjerë veten në ato çaste kur keni fituar çmimin " Miss Sharmi" ?

Teuta Shabani: Jam ndjerë shumë e kënaqur, që e kam marrë këtë çmim dhe është me të vërtetë një kujtim i paharruar për jetën time. Ishte një gjendje emocionale e papërshkruar…

Jeni në përgatitje edhe të një albumi muzikor. Me cilën lloj muzike shoqërohet kënga, tekstet dhe si është titulluar albumi i Juaj?

Teuta Shabani: Albumi është një ëndërr dhe një dëshirë e hershme e imja dhe më duket se fati më eci mbarë dhe kjo ëndërr do të plotësohet e natyrisht shpresoj se do t'i pëlqejë popullit shqiptar kënga ime. Këngët janë në gjuhën shqipe, muzika është zbavitëse dhe shpresoj se do adhurohet nga publiku.

Na e shpjegoni ndjenjën Tuaj si bashkohet kënga dhe e bukura në skenë?

Teuta Shabani: Që të dyjat kanë të bëjnë me skenizëm. Skena për mua është një ndjenjë më e bukura që mund ta përjetojë njeriu, sepse, kur jam në skenë edhe jetoj. Kjo, është kënaqësi e veçantë, një emocion, i cili dëshiroj të përcillet tek adhuruesit e muzikës sime e muzika siç e dimë e fisnikëron shpirtin e njeriut.

Cila është porosia e Juaj për femrat tona, për ato, të cilat, dëshirojnë të marrin pjesë në konkurset e bukurisë apo të bëhen yje të spektakleve gjigante?

Teuta Shabani: Porosia ime është për bashkmoshataret e mia kjo: Nëse keni vetbesim mos hezitoni, është eksperiencë që sa më shumë ti mbledhim përvojat tek vetvetja, aq më shumë krijohet edhe vlera e identitetit. Personaliteti të bënë më të fortë dhe me të vërtet fiton edhe më shumë vetbesim kur mundesh të sfilosh në skena para një publiku të madh dhe televizioneve me shumë shikues.


Planet e Juaja në të ardhmen?

Teuta Shabani: Plani konkret është ta përfundojë albumin muzikor që është tash gati në mbarim. Ti kryej studimet për producente të muzikës dhe ti ndihmojë familjes time, prindërve e dy vëllezërve të mi, të cilët, gjithmonë më kanë mbështetur në dëshirat dhe kërkesat e mia dhe më kanë ofruar përherë dashuri e ngrohtësi për të arritur qëllimet e mia në jetë.Mami im është përherë me mua kur udhëtoj jashtë shtetit dhe e dua shumë. Familja është gjithçka për mua. Nuk thuhet kot se baza e edukimit për fëmijën janë prindërit.
Ju përshëndes të gjithëve që e vizitoni albanur.net dhe që e lexoni këtë intervistë.

Faleminderit dhe në emër të stafit www.albanur.net, ju dëshirojmë shumë suksese dhe gjithë të mirat


.