[albanur]

EDONA LLALLOSHI PROMOVON ALBUMIN ME TE RI HYMNI I DASHURISE

Edona i thur himne dashurise

Ajo që nga fillimi i daljes në skenë ka lënë përshtypjen e një vajze serioze që di të ndërtojë stilin e saj dhe ta ruajë atë për disa vite. Mirëpo, kohët e fundit vërehet një ndryshim në dukjen e saj. A është kjo një shenjë se Edona Llalloshi është mërzitur me pamjen e saj të njëjtë? Jo, jo, kjo është një freski që ajo mundohet ta bëjë. Dhe një të tillë e ka bërë edhe në fotot e fundit të saj, të realizuara ekstra për albumin më të ri, të cilin do ta përurojë me datë 20 të këtij muaji. Janë të gjitha këngët e albumit himne dashurie, prandaj ka pëlqyer ta quajë albumin me këtë emër. Ajo ka filluar të merret me muzikë duke u menaxhuar nga babai, i cili vazhdon ta shoqërojë kudo që paraqitet. Dhe rezultati nuk i ka munguar, Gjithsesi, për faktin se ajo është shumë këmbëngulëse në kërkesat ndaj vetes. Por gjithashtu se është nga ato që suksesin rreth punës së saj nuk ia lë në duar askujt, duke u kujdesur për çdo detaj. Por, asnjëherë duke mos vendosur vetë, pa pëlqimin e shumë miqve të saj bashkëpunëtorë.

Edona Llalloshi me album dhe klip të ri

Tashmë ka përfunduar punën rreth albumit më të ri “Himni i Dashurisë” dhe pret vetëm ta nxjerrë në treg. S’ka se si të ndjehet ndryshe, pos shumë e relaksuar. Meqë ka përfunduar pjesën e saj të punës. Gjithashtu punën e tyre e kanë mbaruar edhe kompozitorët, poetët, autorë të teksteve. Me një fjalë, siç thotë Edona, albumi në tërësi ka përfunduar. Tani është në duart e shtëpisë muzikore “Vizioni-Libonia”, të cilët ajo beson se shumë shpejtë do ta nxjerrin në treg. Gjithsesi shprehet me optimizëm se albumi do të ketë suksesin e dëshiruar. “Jam më se e sigurt se do të pritet mirë nga publiku dhe adhuruesit e këngës sime, pasi, të them popullorçe, ia kemi bërë hyzmetin deri në fund”. Thekson këngëtarja, është kjo Edona, e cila është mësuar të kujdeset madje edhe për detajet më të vogla gjatë realizimit të projekteve të saj, që gjithsesi s’ka pasur se si pastaj të mos rezultojnë të suksesshme. Një gjë që ia garanton këtë është edhe zgjedhja e bashkëpunëtorëve të saj. Këtë herë punën rreth kompozitorëve dhe teksteve ua ka besuar autorëve, si: Xhevdet Gashi, Afrim Macula, Fatos Canolli, Arsim Bunjaku, Milaim Islami, Igballe Ymeri. “Himni i Dashurisë” është titulli i albumit, që Edonës i ka pëlqyer si propozim nga Naime Beqiraj, për ta zgjedhur si emër pagëzues të albumit, Edona ka bërë edhe një seri fotografish, ku shihet një Edonë origjinale, pa lëvizur shumë nga preferencat e saj për dukjen, për të cilën gjë, pra për ‘styling’ dhe ‘ make-up’, ajo tregon se kujdeset çdoherë motra e saj Fjolla. Fotografitë e albumit i ka punuar Avni Selmani. Këngëtarja thotë se as promocionin e albumit nuk do t’ia lërë askujt në duar, por do të bëjë vetë. Përurimin do ta bëjë rreth datës 20 të këtij muaji, në ambientet e hotel “Viktoria” në Prishtinë, gjë që, gjithsesi, thotë ajo, do të jetë në nivelin e dëshiruar.

Motivi i bërjes së duetit me të vëllain

Jo vetëm njëra nga këngët e albumit është një himn dashurie, por i tërë albumi është i tillë. Ky titull lidhet me të gjitha këngët e tij. Pra temë e këngëve të tij është dashuria. Edona mendon se, ndonëse ka risi në album, prapë mbetet ajo Edona e mëhershme. “ Edhe në këtë album, si në çdo album tjetër ka risi, por prapë mendoj se nuk jam shkoqitur nga stili im i mëhershëm. Megjithatë ta lëmë të shprehet publiku, posa të dëgjojë albumin”, pohon ajo. Patjetër se është kujdesur që nxjerrja e albumit të bëhet më me jehonë. Për këtë ka realizuar një videoklip, si paralajmrim të tij. Dhe ka zgjedhur këngën “Ditë për ditë”, të cilën në album e ka radhitur të parën. “Mendoj, por edhe shumë të tjerë që e kanë dëgjuar albumin, se është një këngë shumë e bukur, me njw ritëm dhe orkestrim paksa të veçantë, me një tekst shumë të bukur”, shprehet ajo për arsyen e zgjedhjes së kësaj kënge, duke shtuar se ka dhe këngë të tjera në album ndoshta edhe më të mira, por vendimi për këtë këngë ka ardhur, pasi, siç thotë ajo, kjo dallon nga ato të mëhershmet e saj. Sipas saj, edhe klipi është realizuar shumë mirë. Ai ka disa ditë që është duke u transmetuar në ekranet televizive dhe për të ajo thekson: “Po më pëlqen shumë që klipi është pritur shumë mirë nga publiku”. Mbase ky s’do të jetë i vetmi spot i këngëve të albumit, pasi Edona thotë se ka mundësi që pas një muaji të realizojë edhe një tjetër, që ndoshta do të jetë kënga në duet me të vëllain, Milotin. “Mendojmë që, nëse do të kemi kohë, pas një muaji të realizojmë edhe një klip. Ndoshta dueti me Milotin ose ndonjë këngë tjetër”, rrëfen ajo, duke mos u shprehur kurrë në njëjës, si respekt për të gjithë ata që kanë ndihmuar për finalizimin e projektit të saj. Po, Përse sërish një këngë me të vëllain? Cili është motivi i bërjes së këtij dueti dhe çfarë të mire do t’i sjellë asaj? “Miloti ka shumë talent për muzikë dhe shpeshherë edhe më shoqëron në punën time”, shpjegon Edona, duke treguar gjithashtu se angazhimi i Milotit nuk është shumë i shpeshtë, pasi ai është shumë i zënë me shkollë dhe me punën e vet. Kjo është arsyeja pse ai e ka lënë pak anash muzikën. Dhe bërja e ndonjë dueti kohë pas kohe, siguron se do të ishte shumë e mirë për të, sikur që është një kënaqësi për Edonën. “Meqë të dy kemi dëshirë të jemi bashkë në një duet dhe besoj se edhe këtë herë, sikur në duetin e kaluar, do të kemi sukses”, thekson ajo.

Kur këngwtarja menaxhohet nga i ati

Ndërkohë angazhimet e saj nëpër mbrëmje e koncerte të ndryshme kanë qenë jo të pakta në këtë periudhë të parë të vitit, ato do të rriten edhe më shumë në muajt në vazhdim. Edhe kësaj vere do të jetë e angazhuar në Durrës, por këtë herë në një terracë shumë të bukur. “është kënaqësi të pish një pije në mbrëmje dhe të dëgjosh muzikë të mirë në këtë vend”, thekson ajo, duke shprehur bindjen se do të kënaqen të gjithë ata që do të kenë rastin të dëgjojnë atë me orkestrën në terracën “Parajsa” në qytetin e Durrësit. Ajo ka filluar të merret me muzikë duke u menaxhuar nga babai, i cili vazhdon ta shoqwroj kudo që paraqitet. Dhe rezultati nuk i ka munguar. Babi i saj prej viteve ’90 është marrë me menaxhim të këngëtarëve nëpër koncerte, festivale, albume etj. Edona shprehet se ka qenë me fat që nuk ka kaluar kohë duke ndërruar njerëzit që do ta menaxhonin punën e saj. Gjithsesi, mendon ajo, se dikush duhet të merret me punën e një këngëtari apo këngëtareje dhe se nuk nënkuptohet se po që se është i familjes, atëherë ai di të menaxhojë. Madje, sipas saj, të menaxhosh nuk është aspak punë e lehtë. “Unë ndoshta edhe kam pasur fatin që nuk kam shëtitur shumë për të menaxhuar dikush punën time”, shprehet ajo duke thënë se është e lumtur që pranë vetes ka babain menaxher, i cili e kryen punën me mjaft sukses.