Portreti i Albin Kurtit ne gazeten Kosova Sot

PORTRETI I JAVËS "KOSOVA SOT" ALBIN KURTI

Albini ose Miti per Sizifin

Albin Kurti, emër i shquar në publicistikën shqiptare, si student u rreshtua në anën e atyre që luftonin për t’i shkëputur prangat e robërisë dhe, edhe nga burgu, duke iu rezistuar torturave fizike më çnjerëzore, do ta ngritë zërin për luftën e drejtë të popullit të tij

Albin Kurti aktualisht është ndër emrat më të shquar të publicistikës shqiptare të këtij shekulli. Me shkrimet e tij sistematike, koncize, të matura dhe para se gjithash largpamëse, bën që Albin Kurti të rreshtohet në majat e larta të elitës intelektuale shqiptare. Praktikisht, Albin Kurti jo vetëm që nuk është i rreshtuar në ato lartësi intelektuale, por përkundrazi shqelmohet nga të gjitha anët për të mos arritur majën, gjë që lufta e tij intelektuale do na përkujton mitin për Sizifin. Vetëm për pak çaste përpiquni t’i rikujtoni momentet më dramatike të çështjes shqiptare dhe daljen në skenë të Albin Kurtit.

Viti 1997. Një djalosh kaçurrel e flokëgjatë. Një djalosh i mbushur plot pezëm e vrer kundër atyre që burgosnin dhe vrisnin shqiptarët. Një të ri me syshqiponjë, i revoltuar jo vetëm me politikën e sistemit okupues, por edhe të politikës nënshtruese të faktorit të brendshëm. Një djalosh që çlirimin e atdheut e donte më shumë se jetën e tij, e ky ishte Albin Kurti.

Figura e tij ishte fascinuese për popullin shqiptar të robëruar me shekuj. Dalja e tij në skenë ishte shpresëdhënëse për shpirtrat tanë të robëruar, që deri asokohe predikohej politika nënshtruese. Më në fund zëri i rinisë kosovare po dilte në skenë i artikuluar e jo konfuz, siç ishim mësuar të dëgjonim zëre, që nga mbledhjet e ndryshme ku thuhej në komunikata të tyre partiake se e kishin dënuar ashpër dhunën serbe, me fjalë ashpër kishin dënuar vrasjet e bijve dhe bijave tona, e menjëherë pas nënshkrimit të komunikatave ia shtronin darkave dhe ahengjeve në restorante më të njohura. Zëri i Albin Kurtit ishte ndryshe nga zërat partiakë, e asokohe parti politike kishte po aq sa kemi edhe sot. Gjatë atyre viteve, edhe pse ishte sistem pluralist, mbretëronte ideja e mendimit monist. Të jepje mendime ndryshe nga ç’thoshin liderët e asaj kohe ishte vetëvrasje politike. Ishte vetëm vetëvrasje politike?! Jo. Ata që mendonin ndryshe nga liderët e asaj kohe, siç qe dalja në skenë e UÇK-së, protestat e Unionit të studentëve etj, konsideroheshin si të nxitur nga Serbia dhe njerëzia fillonin t’i urrenin. Nuk dihej kujt t’i besohej: atyre që thoshin se Kosova do të çlirohej pa asnjë fishek të zbrazur, apo atyre që zbraznin fishekë dhe luftonin kundër forcave te armikut. Albin Kurti rreshtohej në anën e atyre që luftonin për t’i shkëputur prangat e robërisë. Ky rreshtim natyrisht që do t’i kushtonte shtrenjtë në të gjitha aspektet, siç u kushtoi të gjithë atyre që i kapen armët dhe atyre që me forma të tjera ndihmuan luftën.

Njeriu që ua prishte rehatinë

Albin Kurti konsiderohej si njeri që me Lëvizjen studentore po ua prishte rehatinë pashallarëve që ishin mësuar të rrugëtonin në udhëtime zyrtare, për të mbledhur haraçin e diasporës, ua prishnin rehatinë tregtarëve të mëdhenj që kishin lidhur miqësi dhe jarani me tregtarët serbë, ua prishnin rehatinë edhe tregtarëve të vegjël si: butikëve, restoranteve e kafeneve ku zihej politika më shumë se në selitë partiake. Ç’ishin ato deklarata të Albin Kurtit, që thoshte se vetëm me luftë armiku mund të largohet, pëshpëritej kafeneve dhe selive te partive politike të regjistruara në Beograd. Lufta është shkatërruese, thoshin ata duke u mbështjellë në tymin e zymtë të duhanit dhe erën e “shlivovicës”. Më lehtë ishte të mbështillesh me tymin e duhanit e të flisje kundër Albin Kurtit se të flisje kundër sistemit okupues. Të flisje kundër Albin Kurtit, selitë e partive politike të çmonin, të quanin militant dhe luftëtar besnik të partisë. Sa më shumë të flisje kundër Albin Kurtit dhe Unionit të studenteve, shquheshe për besnikëri e devotshmëri partiake që ata e klasifikonin atdhetare. Të mendoje e të shprehje opinionin se Albin Kurti e kishte mirë, ishte rrezik i dyanshëm: rrezik nga forcat policore te armikut, se ata të burgosnin, rrezik nga partia se të përjashtonte. Ç’lojë luhej?! Nga masa e popullit askush nuk e dinte. Beogradi e dinte lojën. Selitë e partive dhe disa liderë e dinin lojën. Albin Kurti kishte dal nga korniza e lojës dhe hidhte vallen e lirisë, pa dëshirën e shumicës se liderëve të asaj kohe. Albini e dinte se kishte hyrë në një rrugë të rrezikshme dhe pa kthim. Luftëtarët e lirisë e dinin po ashtu se rruga e tyre çlirimtare ishte pa kthim dhe ai që mund te kthehej do ta gëzonte atë që me shekuj kishin ëndërruar gjenerata e mëparshme shqiptare. Nga krerët e partive politike Albini konsiderohej i papërshtatshëm dhe tejet i rrezikshëm, andaj duhej ta ndalonin. U përpoqën duke krijuar një institucion të të rinjve me të njëjtin emër që Albinit t’i kundërviheshin me të njëjtën armë që ta neutralizonin. Albini nuk neutralizohej, përkundrazi ecte me hapa te sigurt. Shkonte drejt vdekjes?! Shkonte drejt burgut?! Për Albin ishte krejt një. Më mirë i vdekur ose i burgosur se sa i nënshtruar e i poshtëruar. Në momentet më kritike, në momentet më dramatike të kredibilitetit, aso kohe Kosovës në ndihmë do t’i vinte zëri nga Uashingtoni, kur Gelbarti haptas mes tjerash u tha se ai nuk ishte Supremen që mund ta çlironte Kosovën.


Zhdavariti mjegullën e mendimit konfuz

Ky zë engjëllor ishte sinjal se pa luftë shqiptarët nuk duhej te shpresonin asgjë, as nga Amerika e as nga Evropa. Ky zë e zhdavariti mjegullën e mendimit konfuz që mbretëronte në Kosovë, dhe Albin Kurtit i dha zemër, siç u dha zemër të gjithë shqiptarëve. Pas kësaj, Albin Kurti do të vizitonte qendrat e vendosjes ndërkombëtare, përveç tjerash edhe Brukselin. Me fjalën e Albin Kurtit do të mbetshin të kënaqur personalitete të njohura të politikës evropiane, me ç’rast përkrah Albin Kurtit do të mbanin konferenca për shtyp senatorë e deputetë shumë të njohur, të cilët përkrahnin vizionin e Albin Kurtit për ardhmërinë e Kosovës. E lufta e Kosovës mori përmasa ndërkombëtare. E Albin Kurti, zëri i lirisë, do të burgosej pa e shijuar asnjë sekondë ajrin e lirisë. Në burg do t’u rezistonte torturave fizike më çnjerëzore dhe pikërisht nga burgu Albin Kurti do ta ngrehte zërin për luftën e drejt të popullit të tij. Vetëm në këto momente shqiptarët po e kuptonin se forcën magjike dhe vizionin largpamës të Albin Kurtit. Nga burgu Albin Kurti e fitoi simpatinë gjithëpopullore dhe secili shqiptar mburrej që e kishte Kosova një djalë si Albini. Posa të lirohej nga burgu, Albin Kurti brenda disa muajve në popull do të zbret dashuria ndaj Albinit dhe disa vjet më vonë do të mbetët i rrethuar vetëm nga më të vendosurit.

Ngjarjet politike që do të zhvillohen në Kosovën e pasluftës dhe në Kosovën e pas pavarësisë, Albin Kurtin do ta shqetësojnë. Çuditërisht, edhe sot Albin Kurti do të trajtohet një lloji siç u trajtua në vitet e paraluftës. Ta përkrahësh idenë e Albinit të përjashtojnë nga partia, nuk të ofrojnë ndihma sociale e as nuk mund të regjistrohesh në Universitet. Madje ndoshta ju duket e pabesueshme, por është e vërtetë se edhe disa prindër “vizionarë” i këshillojnë fëmijët e tyre që mos të bëhen përkrahës të Albinit, se ata do ua ndërpresin ndihmat materiale të nevojshme për studime. Albini në vitet e paraluftës konsiderohej ekstremist dhe i rrezikshëm, e tash përsëri me të njëjtat etiketa etiketohet. Albin Kurti gjendet në vendnumërim, por ideja e tij e ka bërë që Kosova të ecën përpara. Një gjë duhet të sqarohet se Albin Kurti dhe “Vetëvendosja” është një forcë , një gjenerator që i ka shërbyer Kosovës dhe vetë grupit tonë negociator e qeverisë sonë, që ta ketë më lehtë arritjen e shpalljes se Pavarësisë. Pa “Vetëvendosjen” Kosova do ta kishte edhe më të cunguar pavarësinë.

Pse shqetësohet Albin Kurti?! Kosova i takon veç Albin Kurtit?! Dihet se Kosova nuk është pronë e Albin Kurtit, por e secilit nga pak. Albini e kërkon të drejtën e atyre të heshturve dhe frikacakëve, që deri në momentin e fundit e shikojnë rehatinë personale, e në çastet e të heshturit shndërrohen në forcë e frikacakët i uzurpojnë postet dhe përsëri Albin Kurtit i mbetët burgu ose burgu shtëpiak, revolta ose i atribuohet një mirënjohje dhe një rrogë, siç u veprua me Bacë Adem Demaçin e shumë e shumë vjet më vonë, gjeneratat e tjera, Albin Kurtin do ta shohin si njeri me një vizion largpamës.


03 maj 2008 Kontakt : Reshat80@hotmail.com 

Per te shkruar komentin e juaj per Albin Kurtin, Kliko Ketu!