Intervista e Kryemistrit te Kosoves Hashim Thaci per Gazeta Shqip

GAZETA SHQIP DHE HASHIM THACI

Hashim Thaçi: Si lindi Kosova e pavarur

Hashim Thaçi u gjend në vendin e duhur dhe momentin e duhur. Ishte ai nxitësi kryesor i pavarësisë së njëanshme të shtetit më të ri të botës dhe ishte pikërisht ai, që më 17 shkurt lexoi deklaratën e pavarësisë së Kosovës. Kryetari i Partisë Demokratikë të Kosovës, në zgjedhjet parlamentare të 17 nëntorit 2007, doli fitues me afro 36% të votave. Për të formuar qeverinë krijoi një koalicion me Lidhjen Demokratike të Kosovës, parti kjo që ka pasur fërkime të shpeshta e që në këto zgjedhje mori 22 për qind të votave. Gjatë një interviste ndryshe për revistën "Shqip", ai ka treguar momentet e vështira të lindjes së Kosovës së pavarur.

Gazeta Shqip: Kujt i dedikohet kryesisht merita e lindjes së shtetit kosovar në aspektin e brendshëm dhe të jashtëm?
Hashim Thaçi: Shteti i pavarur dhe demokratik i Kosovës është rezultat i përpjekjeve të gjata të popullit të saj për liri. Këto përpjekje u kuptuan drejt nga bota demokratike, bota perëndimore, e cila në momentet më të rënda u radhit në anën tonë, në anën e lirisë. Në qershor të vitit 1999 u arrit një fitore e madhe e vlerave të lirisë mbi tiraninë dhe shtypjen. Shteti i Kosovës është zyrtarizim ndërkombëtar i kësaj fitoreje. Kjo është meritë e popullit të Kosovës dhe e të gjitha shteteve demokratike të botës që ndihmuan në krijimin e shtetit tonë.

Gazeta Shqip: Ju keni lindur dhe keni qenë deri pak vite më parë formalisht qytetar jugosllav. Jeni ndjerë ndonjëherë i tillë?
Hashim Thaçi: Jugosllavia ka qenë një shtet artificial, fillimisht i ndërtuar mbi ideologjinë komuniste, që më pas u rrënua në mënyrë të turpshme. Millosheviçi u përpoq të rindërtonte një Jugosllavi, të dominuar nga ai, përmes gjakut e dhunës dhe pasojat ishin të tmerrshme. Kësisoj, identiteti jugosllav gjithmonë ka qenë një konstruksion i sajuar dhe i imponuar. Njerëzit e vendit tim gjithmonë e kanë parë kështu. Unë kam ndarë të njëjtin qëndrim dhe ndjenjë me ta.

Gazeta Shqip: Mund të na thoni si u rrit dhe u maturua te ju ideja dhe përpjekja për pavarësi?
Hashim Thaçi: Pavarësia ka qenë një ide e natyrshme e një populli të shtypur. Askush nuk do të jetojë nën një çati me dikë, i cili, kur i kërkon të drejtat e tua, të përgjigjet me tanke. Gjithmonë kam besuar se aspirata më e thellë e qenies njerëzore është aspirata për liri. Të gjitha përpjekjet e mia politike, që nga rinia e hershme, janë udhëhequr prej këtij besimi.

Gazeta Shqip: Përse rruga paqësore për Kosovën e pavarur e iniciuar nga Rugova nuk funksionoi? Ndoshta duke qenë paqësore nuk mund të arrinte pavarësinë?
Hashim Thaçi: Regjimet diktatoriale, regjimet e aparteidit, nuk janë të prirura të kuptojnë gjuhën e tolerancës e të paqës, as zgjidhjet e negociuara të problemeve. Por shtypja nuk ishte caku i fundit i regjimit represiv të Millosheviçit. Caku i tij ishte spastrimi i plotë i Kosovës nga shqiptarët. Ne e kuptuam se kishte ardhur momenti i duhur të bënim diçka për të ndaluar këtë plan të së keqës. Nën anën tjetër kishim një besim brenda vetës se bota perëndimore, bota e lirisë, do të na mirëkuptonte në përpjekjet tona. Ajo që erdhi më pas na dha të drejtë.

Gazeta Shqip: Kufijtë e Kosovës janë shënuar nga Tito. Nuk është paradoksale?
Hashim Thaçi: Kufijtë e Kosovës nuk janë dhuratë politike e askujt. Ato janë shprehje e një realiteti territorial, tashmë i njohur dhe i garantuar ndërkombëtarisht.

Gazeta Shqip: Dy shtete shqiptare në Ballkan janë shumë apo janë shumë pak?
Hashim Thaçi: Shteti i pavarur dhe demokratik i Kosovës nuk është ndërtuar mbi parimin etnik. Është shtet i ndërtuar mbi idenë e demokracisë qytetare, që njeh identitetet kulturore të të gjithë qytetarëve të tij dhe i garanton me Kushtetutë. Në themele të këtij shteti qëndrojnë vlerat e patriotizmit kushtetues.

Gazeta Shqip: Kosova Lindore do të mund t‘i bashkëngjitet shtetit të ri kosovar, ose të shkëmbehet me komunat e Leposaviç dhe zona të tjera të Veriut, që faktikisht janë të aneksuara nga Serbia?
Hashim Thaçi: Shkëmbimet territoriale vijnë në shprehje në shtetet që udhëhiqen nga parimet etnike. E thashë më lart, Kosova nuk është një shtet i tillë. Gjendja ekzistuese e kufijve është premtuese për stabilitetin afatgjatë të rajonit. Ky stabilitet është parakushti themelor për integrimin e tërë rajonit tonë në strukturat euroatlantike.

Gazeta Shqip: Raportet tuaja me Beogradin do të jenë gjithmonë konfliktuale, apo në një të ardhme do të ketë edhe bashkëpunim?
Hashim Thaçi: Politika shtetërore e Kosovës udhëhiqet nga parimi i fqinjësisë së mirë. Shteti i Kosovës ka lindur në një bashkësi të madhe miqsh dhe ne duam që edhe Serbia të bëhet pjesë e kësaj bashkësie të miqëve të Kosovës. Unë besoj se një ditë kjo do të ndodhë

Gazeta Shqip: Serbia mund t‘ju sulmojë?
Hashim Thaçi: Ide të tilla tashmë i takojnë së kaluarës së errët, që nuk do të kthehet kurrë më. Të sulmosh dikë sot në Evropë do të thotë të sulmosh Evropën, idenë e saj, projektin e saj të bashkimit dhe lirisë.

Gazeta Shqip: Ka forca paramilitare serbe në territorin tuaj?
Hashim Thaçi: Institucionet e Kosovës, në bashkëpunim me mekanizmat ndërkombëtarë të pranishëm në Kosovë, ushtrojnë tërë autoritetin e ligjshëm në çdo pjesë të vendit. Nuk do të tolerohet asnjë strukturë paralele, apo parashtetërore. Jam i inkurajuar me faktin se qytetarët serbë të Kosovës janë me të shpejtë duke e kuptuar se adresa më e sigurt për interesat e tyre janë autoritetet legjitime të Prishtinës, e jo strukturat ilegale që nuk premtojnë asgjë tjetër veçse kthim në të kaluarën e errët dhe në izolim.

Gazeta Shqip: Përse pas hyrjes së trupave të NATO-s shumë serbë u larguan nga Kosova?
Hashim Thaçi: Ka qenë një frikë në mesin e tyre. Tash të gjithë qytetarët e Kosovës që janë shpërngulur duhet të kthehen në shtëpitë dhe pronat e tyre. Në kuadër të qeverisë sime, ekziston një ministri e veçantë për këtë çështje dhe një zyrë pranë zyrës sime për komunitete, që do t‘i adresojë të gjitha shqetësimet e tyre. Respekti kushtetues për minoritetet është një nga vlerat themelore të shtetit të pavarur dhe demokratik të Kosovës.

Gazeta Shqip: Po të ishit serb, do të ndiheshit si në shtëpinë tuaj në Republikën e Kosovës?
Hashim Thaçi: Kosova është shtëpia e të gjithë qytetarëve të saj, pa dallime etnike a religjioze. Në Republikën e Kosovës dallimet nuk do të jenë kërcënim, por pasuri.

Gazeta Shqip: Ç‘politikë mendoni të ndiqni për të luftuar trafiqet ilegale dhe trafikantët e tyre?
Hashim Thaçi: Sundimi i ligjit, si në institucione, ashtu edhe në sistemin ekonomik, është prioritet absolut i qeverisë sime. Do t‘i investojmë të gjitha kapacitetet tona në mekanizmat që garantojnë këtë sundim. Kosova ka qenë deri më tani shembull i shkëlqyer në rajon i mbajtjes së zgjedhjeve demokratike, e do të bëhet edhe shembull i shkëlqyer i sundimit të ligjit dhe drejtësisë. Qasja ime është e qartë: zero tolerancë ndaj krimit dhe korrupsionit.

Gazeta Shqip: Mendoni që një pjesë e diasporës së Kosovës do të kthehet për të jetuar në atdhe? Ju e dëshironi këtë?
Hashim Thaçi: Zgjedhja e vendit të jetesës është zgjedhje individuale, por politika shtetërore e Kosovës për diasporën do të jetë shumë favorizuese. Do të miratohen ligjet përkatëse në këtë segment, që diaspora jonë të ndjejë dorën e ngrohtë të shtetit të Kosovës, për të cilin meritat e saj janë shumë të mëdha.

Gazeta Shqip: Shteti juaj e ka besuar sigurinë e tij në forca të armatosura të huaja (NATO), përveç policëve, gjyqtarëve e të tjerë të huaj. Mendoni se është korrekte ta quash Kosovën një protektorat euroatlantik?
Hashim Thaçi: Kosova është shtet i pavarur, sovran dhe demokratik. Prezenca e NATO-s dhe BE-së në Kosovë është një ndihmesë e jashtëzakonshme për ne. Do t‘u jemi mirënjohës përgjithmonë. Nuk shoh asnjë arsye që të problematizohet kjo prezencë me vetë faktin se Kosova aspiron të bëhet pjesë e NATO-s dhe BE-së. Shtetet në tranzicion kanë nevojë për përkrahje dhe Kosova në këtë segment mund të them se është fatlume. Ka përkrahësit më të mirë të mundshëm.

Gazeta Shqip: Italia ka kontribuar në luftën ndaj Jugosllavisë, si dhe për pavarësinë e Kosovës, megjithatë konsiderohet si filoserbe. Ju çfarë mendoni?
Hashim Thaçi: talia ka qenë në grupin e parë të shteteve që kanë njohur pavarësinë e Kosovës. Në emër të popullit të Kosovës dhe qeverisë që drejtoj, e falënderojmë qeverinë italiane, e cila gjithmonë ka udhëhequr politikën e mirëkuptimit për realitetin në Kosovë dhe për aspiratat e popullit të saj. Besoj se në mes dy qeverive tona do të ndërtohen raporte të shkëlqyeshme të bashkëpunimit.

Gazeta Shqip: Një numër i madh shtetesh ende nuk e kanë njohur pavarësinë e Kosovës. Do të duhet shumë kohë?
Hashim Thaçi: Besoj se brenda vitit njohja e pavarësisë së Kosovës nga shtetet anëtare të OKB-së do të jetë pothuajse në përfundim. Është rasti i rrallë që një shtet i ri të njihet në mënyrë kaq të shpejtë sa shteti i Kosovës. Dua të përsëris atë që thashë më lartë: shteti i Kosovës ka lindur në një bashkësi të madhe miqsh.

Gazeta Shqip: Si i shikoni raportet në të ardhmen me Shqipërinë?
Hashim Thaçi: Do të jenë raporte shumë të mira, të bashkëpunimit politik, ekonomik dhe në fushat e tjera me interes të përbashkët. Bashkëpunimi rajonal është një nga rrugët e vendeve tona drejt strukturave euroatlantike.

Sorce: Gazeta Shqip